ဒီနေ့တော့ သူငယ်ချင်းတွေကို ဥရောပ ငှက်တွေအကြောင်း ပြောပြချင်ပါတယ်။ ဂျာမန်တန်းမှာ ဆရာပြောပြခဲ့သမျှ ထဲက မှတ်သားမိသလောက်ပေါ့။ ဥရောပမှာ ငှက်အုပ်စု (၃) မျိုးရှိပါတယ်။

၁။ ဧည့်သည်ငှက်၊
၂။ အမြဲနေငှက်
၃။ ကြားနေငှက် တို့ပဲ ဖြစ်ပါတယ်။

ဧည့်သည်ငှက်ဆိုတာကတော့ ဥရောပရဲ့ နွေဦးရာသီတွေမှာ လာနေတတ်ပြီး ဆောင်းတွင်းရောက်တဲ့အခါ ပြန်သွားတတ်တဲ့ ငှက်မျိုးပေါ့။ ငှက်မပြောနဲ့ လူတောင် ပြန်ချင်စရာကောင်းလောက်အောင်ကို ဥရောပဆောင်းက အေးလှပါတယ်။ အမြဲနေငှက်ကတော့ ဥရောပသားငှက်တွေပေါ့။ သူတို့က ၁၂ ရာသီလုံး နေတယ်လေ။ သူတို့ထဲမှာ မပါတဲ့ ငှက်တွေကတော့ ကြားနေငှက်တွေပေါ့။ ပြန်တဲ့အခါ ပြန်တယ် မပြန်ချင်တဲ့အခါ မပြန်တဲ့ ငှက်တွေဆိုပြီး ၃ မျိုးရှိပါတယ်။

ဥရောပအလယ်ပိုင်းက နာမည်ကြီး ရိုင်းမြစ်ရိုးတစ်လျှောက်မှာ အနေများကြပါတယ်။ ရိုင်းမြစ်ရိုးတစ်လျှောက်က ပိုနွေးတဲ့အတွက် အဲဒီဒေသတဝိုက်မှာ ကျက်စားလေ့ရှိကြပါတယ်။ ဘာလင်မြို့တဝိုက်မှာရှိတဲ့ ငှက်တွေကတော့ ဆောင်းရာသီဆို အစာရေစာရှားပါးတာရော အအေးပိုတာရောကြောင့် ဆောင်းမှာဆို ငှက်တွေကို အတွေ့ရနည်းပါတယ်။ ဆောင်းရောက်တဲ့အခါ ငှက်တွေကို ဘယ်ကို ပျံသန်းသွားကြသလဲဆိုတာကို လေ့လာမှုတွေ ပြုလုပ်ခဲ့ကြပါတယ်။ အဲဒီမှာ ငှက်အဖွဲ့ (၃)ဖွဲ့ကို ထပ်တွေ့ခဲ့ကြပြန်ပါတယ်။ အောက်မှာ ငှက်တွေ ဘယ်လမ်းကြောင်း ကနေ ပြန်သွားကြတယ်ဆိုတာကို လေ့လာနိုင်ပါတယ်။


အဲဒီပုံလေးမှာ ဘာကိုတွေ့ရသလဲဆိုရင် တချို့ငှက်တွေဟာ ဆောင်းရောက်တဲ့အခါ ဥရောပ အနောက်ပိုင်း ပြင်သစ်တို့ စပိန်တို့ကို ဖြတ်ပြီး အာဖရိကအလယ်ပိုင်းကို ပြန်သွားကြတာ တွေ့ရပါတယ်။ တချို့က အရှေ့ဘက်ခြမ်းဖြစ်တဲ့ ဂရိနိုင်ငံတွေဘက်ကနေ အာဖရိက အလယ်ပိုင်းကို ပြန်သွားကြပါတယ်။ တချို့ကတော့ မြေထဲပင်လယ်ကို ဖြတ်ပြီး ပြန်သွားကြတာကို တွေ့ရပါတယ်။ ဒီနေရာမှာ စိတ်ဝင်စားစရာကောင်းတဲ့မေးခွန်းက ဘယ်လို ငှက်တွေက ဘယ်လမ်းကြောင်းကနေ ပြန်တာလဲဆိုတာပါပဲ။

ငှက်တွေဟာ သူတို့မိဘတွေ ပျံသန်းခဲ့တဲ့ လမ်းကြောင်းအတိုင်းသာ ပျံသန်းကြတာကို တွေ့ရပါတယ်။ အရှေ့ဘက်ခြမ်းက ပျံသန်းနေကျ ငှက်ဟာ အရှေ့ဘက်ခြမ်းကပဲ အမြဲပျံတာကို တွေ့ရပါတယ်။ ဒါ့ကြောင့် ဥရောပမှာ ရှိတဲ့ ငှက်အကြောင်း လေ့လာသူများအဖွဲ့က စမ်းသပ်ချက် နှစ်မျိုးကို ပြုလုပ်ခဲ့ကြပါတယ်။ အဲဒါတွေကတော့ အရှေ့ဘက်ခြမ်းက ပျံတဲ့ငှက်နဲ့ အနောက်ဘက်ခြမ်းက ပျံတဲ့ငှက်တွေကို မျိုးစပ်ပေးပြီး သူတို့ ဘယ်လမ်းကြောင်းကနေ ပျံသန်းမလဲဆိုတာကို လေ့လာခဲ့ပါတယ်။

မျိုးဆက်သစ်ငှက်ကလေးတွေဟာ အမေပြန်ခဲ့တဲ့ လမ်းကြောင်းကိုလည်း မသုံးသလို အဖေပျံသန်းတဲ့ လမ်းကြောင်းကိုလည်း မသုံးကြတာကို တွေ့ရှိခဲ့ပါတယ်။ သူတို့တွေကတော့ မြေထဲပင်လယ်ကို ဖြတ်ပြီး အာဖရိကအလယ်ပိုင်းကို အတိုဆုံး လမ်းကြောင်းနဲ့ ပျံသန်းကြပါတယ်။ နောက်တစ်မျိုးကတော့ အဝေးကြီးပျံသန်းနိုင်တဲ့ ငှက်နဲ့ နီးနီးလေးပဲ ပျံသန်းနိုင်တဲ့ ငှက်တွေကို မျိုးစပ်ပြီး ရလာတဲ့ ငှက်မျိုးဆက်သစ်လေးတွေကို လေ့လာတဲ့အခါ သူတို့ကတော့ အဝေးကြီးလည်း မပျံအနီးလေးလည်း မပြန်တော့ပဲ ဆောင်းရောက်တဲ့အခါ တောင်ဘက်အကျဆုံး ဥရောနိုင်ငံတချို့ကို ပျံသန်းပြီး အစာရှာတာကို တွေ့ရပါတယ်။

နောက်စိတ်ဝင်စားစရာ ကောင်းတာတစ်ခုက သူတို့မှာ သံလိုက်အိမ်မြှောင်လည်း မရှိ၊ Navigation ကိရိယာတွေလည်း မရှိဘဲနဲ့ အာဖရိကအလယ်ပိုင်းကို ဘယ်လို ပျံသန်းကြသလဲဆိုတာပါပဲ။ သူတို့မှာ ရှိတဲ့ အချက် ၃ ခုကြောင့် ခုလို ပျံသန်းနိုင်တယ်လို့ လေ့လာတွေ့ရှိခဲ့ပါတယ်။ အဲဒါတွေကတော့

၁။ သူတို့ရဲ့ မျက်ခွံအောက်မှာရှိတဲ့ Magnetic Zinc လို့ခေါ်တဲ့ ဇီဝသံလိုက်အိမ်မြှောင်
၂။ ညဘက်ပျံသန်းတဲ့အခါ မြင်နိုင်တဲ့ ကြယ်တွေနဲ့
၃။ နေရောင်ခြည်တို့ပဲ ဖြစ်ပါတယ်။

ဒါကတော့ Der Fitis လို့ ခေါ်တဲ့ ငှက်ကလေးပေါ့ဗျာ။ သူ့လိုသာ တောင်ပံတွေပါရင် မြန်မာပြည်ကို ကျောင်းပိတ်ရက်တိုင်း ပျံသန်းလိုက်ချင်ရဲ့။

နေဘယ်အရပ်မှာ ရှိတယ် ဘယ်အချိန်မှာ ပျံသန်းသင့်တယ်ဆိုတာကို သူတို့ ကောင်းကောင်းသိကြပါတယ်။ ငှက်တစ်ကောင်ဟာ 4000 Km ကို အလွယ်လေး ပျံသန်းနိုင်ကြပါတယ်။ သာမန်ငှက်တစ်ကောင်ဟာ 7 g ပဲ လေးပါတယ်။ သူက ဘာအစာမှ မစားသေးခင် 7g အနေအထားမှာ ၂၂၀၀ Km ကို မနားတမ်း ပျံသန်းနိုင်ပါတယ်။ အဲဒီနောက်မှာတော့ သူအစာစားတဲ့အခါ 3 to 5 g ထိစားနိုင်တယ်ဆိုပဲ။ ဒါ့ကြောင့် သူအာဖရိကကို ရောက်တဲ့အခါ သူ့ရဲ့ အလေးချိန်ဟာ 12 g ရှိနေသတဲ့လေ။ အဲလို ပျံသန်းပြီးရင်တော့ ငှက်လေးဟာ ၃ ရက်လောက်နားရတယ်ဆိုပဲ။

သူ့ခန္ဓာကိုယ်အလေးချိန်နဲ့ စာရင် သုံးပုံတစ်ပုံလောက်ကို အသာလေးစားနိုင်တဲ့အတွက် အံ့စရာပေါ့လေ။ 60 Kg ရှိတဲ့ ကျွန်တော်တစ်ရက်လုံး ၃ ခါစားတာတောင် 2 kg အလွန်ဆုံးပဲ ရှိလေတော့ အပုံ ၃၀ ပုံမှ တစ်ပုံလောက်ပဲ စားနိုင်တာပေါ့။ ဒီငှက်ကလေးနဲ့ စာရင် အစားမကြီးဘူးလို့ ပြောရမှာပေါ့လေ။

သူတို့က ဆာဟာရသဲကန္တာရကို ဖြတ်ပြီးပျံသန်းတဲ့အခါ အမြင့်ပေ ၃၀၀၀ အထက်ကနေ ပျံသန်းကြသတဲ့။ ပူလို့ နေမှာပေါ့နော်။ တစ်နာရီကို ၂၁ မိုင်နှုန်းလောက်နဲ့ကို ပျံသန်းကြတာဆိုတော့ ရန်ကုန် Bus ကားတွေထက်တော့ မြန်တာပေါ့လေ။ လေတိုက်နှုန်းနဲ့ပါ ထည့်ပေါင်းလိုက်ရင် နှစ်ဆလောက်မြန်သွားတယ်ဆိုပဲ။ ကန္တာရလို နားစရာမရှိတဲ့ လွင်ပြင်ကြီးကို ဖြတ်ပြီး ပျံသန်းရတဲ့အခါ လိုအပ်တဲ့ ရေကို ဘယ်ကရသလဲဆိုရင်တော့ သူတို့ရဲ့ ခန္ဓာကိုယ်မှာရှိတဲ့ အဆီတွေကနေ ရတယ်လို့ ဆိုပါတယ်။ အဆီ 1g ရှိတယ်ဆိုရင် ရေ 1g ရတယ်ဆိုပဲ။
သူတို့တွေ ပျံသန်းတဲ့အခါ အုပ်စုလိုက်ဖွဲ့ပြီး ဗွီ (V) ပုံသဏ္ဍန်ပျံသန်းတာကို တွေ့ဖူးကြမှာပါ။ ဘာ့ကြောင့် ငှက်တွေ အဲလို ပျံသန်းကြတယ်လို့ သင်ထင်ပါသလဲ။ ဒါကို လေ့လာထားတဲ့ အဖွဲ့ရဲ့ အဆိုအရ သူတို့ဟာ သူတို့ရဲ့ ခွန်အားနဲ့ စွမ်းအင်တွေကို ချွေတာချင်လို့ ဆိုတာကို တွေ့ခဲ့ရပါတယ်။ ဘယ်လို ချွေတာတာလဲဆိုရင် သာမန်ငှက်တစ်ကောင်ရဲ့ ပျံသန်းနှုန်းအတိုင်း ရှေ့ဆုံးက ငှက်တစ်ကောင် ပျံသန်းနေတဲ့အခါ သူရဲ့ နှလုံးခုန်နှုန်းဟာ တစ်မိနစ်ကို အကြိမ် ၁၉၀ ခုန်ပါတယ်။ ခေါင်းဆောင်ငှက်ကြီး ရင်ခုန်သံမြန်တယ်ပေါ့ဗျာ။ သူ့နောက်လိုက်ငှက်တွေကတော့ တစ်မိနစ်ကို အကြိမ် ၁၆၀ ပဲခုန်ပါတယ်။ ဒါဆို ပုံမှန်ပျံသန်းနိုင်တဲ့နှုန်းထက် နောက်က ငှက်တွေက လျော့ပြီး ပျံသန်းခြင်းအားဖြင့် ကြာရှည် ပျံသန်းနိုင်တာကို တွေ့ရပါတယ်။ ခေါင်းဆောင်လုပ်တဲ့သူကတော့ အားလုံးထက် သာအောင် ပျံသန်းရတာပေါ့လေ။

ကျွန်တော့် အသိထဲက အစ်မတစ်ယောက် ဂျာမနီမှာ ငှက်အကြောင်းလေ့လာနေတာဆိုတော့ သူ့အတွက် ဗဟုသုတ တစ်ခုတလေရလို ရငြားဆိုပြီး ဒီပို့စ်ကို ရေးဖြစ်ပါတယ်။

နေကောင်းကျန်းမာ စိတ်ချမ်းသာကြပါစေဗျာ

ခင်မင်လေးစားစွာဖြင့်

herostar

အပေါ်မှာ ပြထားတဲ့ပုံလေးက ဒီနေ့ခေတ်မှာ ရေပန်းစားလာတဲ့ မီဒီယာတွေအကြောင်း တစ်ယောက်တစ်မျိုးစီ ပြောပြီးရေးထားတာလေးပါ။ အဓိကက ကွန်ပျူတာပေါ့ဗျာ။ ဒီနေ့ခေတ်မှာ ကလေးတွေကအစ လူကြီးတွေ အဆုံး အင်တာနက်ကိုပဲ သုံးချင်လာတော့တယ်လေ။ အင်တာနက်မှာက ဂိမ်းဆော့မယ်။ Chatting ပြောမယ်။ ဟိုသတင်းဒီသတင်းဖတ်မယ်။ အရင်တုန်းကလို ရုပ်ရှင်တို့၊ ဗွီဒီယိုရုံတို့ကို မသွားချင်တော့ဘူးလေ။ အိမ်မှာသာ ကွန်ပျူတာရှိလို့ကတော့ အဲဒီရှေ့ကကို မခွာတော့ဘူး။

လူကြီးတွေကတော့ ကိုယ့်စိတ်ကို ထိန်းချုပ်နိုင်တဲ့သူတွေဆိုတော့ တော်သေးတာပေါ့လေ။ ကလေးတွေကျတော့ မရသေးဘူးလေ။ ကျွန်တော့်ဆရာက သူ့သား ၁၂ နှစ်သားလေးကို သူ့လိုပဲ ဘောလုံးကန်စေချင်တယ်။ အားကစားလိုက်စားစေချင်တယ်လေ။ ခုတော့ ကလေးတွေက အားကစားကို ကွန်ပျူတာလောက် စိတ်မဝင်စားတော့ဘူး ဖြစ်နေတယ်တဲ့။ ဂျာမနီမှာက ကွန်ပျူတာဆိုတာက လမ်းဘေးမှာ ပုံထားတာတွေ သွားကောက်ရင်တောင် သုံးလို့ ရနေတတ်တာမျိုးဆိုတော့ အခက်သားလား။ မြန်မာကျောင်းသားပီပီ အဆောင်အောက်မှာ ပစ်ထားတဲ့ တီဗွီတစ်လုံးနဲ့ ကွန်ပျူတာ Desktop ကို အခန်းထဲ ထည့်ထားဖြစ်တယ်။ တီဗွီကတော့ သတင်းကြည့်ချင်လို့ပါ။ Desktop Monitor ကတော့ စားပွဲအောက်မှာ ခြေထောက်တင်ဖို့ထားတာပါ။ အဲလောက်တောင် ပေါလေတော့ သူတို့တွေ ကွန်ပျူတာနဲ့ ရင်းနှီးတာ အဆန်းလား။

ဆန်းတာက ကလေးတွေ ဂိမ်းစွဲတဲ့ရောဂါဗျ။ ဘာဖြစ်လို့လဲဆိုတော့ 11 March 2009 Wednesday နေ့က Stuttgart မြို့နားမှာ ၁၇ နှစ်အရွယ် ဂျာမန်အထက်တန်းကျောင်းသားလေးတစ်ယောက်က လူ ၁၅ ယောက်ကို သေနတ်နဲ့ ပစ်သတ်ခဲ့လို့ပါပဲ။ ဘာရန်ငြိုးရန်စမှ မရှိဘဲ ဘာ့ကြောင့် ပစ်သတ်ခဲ့တယ်ဆိုတာကို တော်တော်နဲ့ မသိခဲ့ကြဘူး လေ။ ဖြစ်ရပ်မှန် သတင်းကို အသေးစိပ်ဖတ်ချင်ရင်တော့ ဒီမှာ ဖတ်လို့ရပါတယ်။ ဒီဖြစ်ရပ်ဟာ ဂျာမနီနိုင်ငံအတွက် ဝမ်းနည်းကြေကွဲဖွယ်နေ့တစ်နေ့ ကို ဖြစ်စေခဲ့တယ်လို့ ဂျာမန်ဝန်ကြီးချုပ် အန်ဂလာမာဂယ် ကိုယ်တိုင် ပြောကြားခဲ့ပါတယ်။

ဒီကျောင်းသားလေးက အတန်းဖော်သူငယ်ချင်းတွေကို သေနတ်နဲ့ ပစ်မသတ်ခင် တစ်လလောက်အတွင်းမှာ သူ့အိမ်မှာ တစ်ယောက်တည်း အခန်းပုန်းနေခဲ့တယ်တဲ့။ ပြီးတော့ Counter Strike လိုသေနတ်ပစ်တဲ့ ဂိမ်းတွေကို အလွန်အကျွံဆော့ခဲ့တယ်လို့ နောက်မှ သိရတယ်။ တကယ့် လူမှု ပတ်ဝန်းကျင်နဲ့ ဝေးကွာနေခဲ့ပြီး အွန်လိုင်းကနေ စကားပြော တစ်ယောက်တည်းနေတာတွေ များလာတော့ စိတ်ဓာတ်တွေ ပျက်ပြားလာတယ် ထင်မိပါတယ်။ အချိန်အများစုကို ဝါးမျိုတတ်တာ အင်တာနက်လေ။ ဒါ့ကြောင့် မသုံးတတ်ရင် တကယ့်ရန်သူပါဆို။

နောက်တစ်ခုက VZO တို့၊ Skype တို့မှာ ရုပ်တွေ အသံတွေနဲ့မြင်နိုင်ပြောနိုင်နေပြီဆိုတော့ သူတို့ဆီမှာလည်း ပိုဆိုးတာပေါ့လေ။ အောက်မှာပြထားတဲ့ ပုံလေးက Themen Aktuell 3 , B-1 ထဲမှာ သင်ခဲ့ဖူးတဲ့ ပုံလေး တစ်ပုံ ဖြစ်ပါတယ်။
ဒီပုံလေးမှာက အသံသွင်းလို့ရတဲ့ တယ်လီဖုန်းလေးထဲမှာ Voice Mail ချန်ထားခဲ့တာလေး ရေးထားတာက ပါ။ သားဖြစ်တဲ့လူက ဒီနေ့ညနေပိုင်းမှာ ချိန်းထားတာလေး နှစ်ခုရှိလို့ သူ့အဖွားလာတဲ့အခါ သူ့အတွက် ဗွီဒီယိုလေး ရိုက်ပေးထားပါလို့ ပြောထားခဲ့တာလေးပါ။ ဒါကို သူမှာတဲ့သူက မတွေ့ဘဲ သူ့အဖွားကတွေ့သွား တာလေးကို ဒီပုံလေးမှာ ပြထားတာဖြစ်ပါတယ်။ ဆိုလိုတာက အပြင်မှာ လူကိုယ်တိုင် ဝမ်းသာအယ်လဲတွေ့ဆုံ ရမဲ့ ကိစ္စပါ။ ခုတော့ မိသားစုတွေ့ဆုံဖို့အတွက် အချိန်မရှိကြဘဲ သူ့အဖွားပြန်သွားမှ ဗွီဒီယိုလေးပြန်ကြည့်ပြီး ဖုန်းဆက်နှုတ်ဆက်မဲ့ သဘောမျိုးပေါ့လေ။

အင်တာနက်တွေ ပေါ်လာတာကောင်းပါတယ်။ တစ်ဖက်မှာကလည်း ခင်မင်ရင်းနှီးမှုတွေက ခပ်ပါးပါး ဖြစ်သွားတာ မျိုးတွေလည်း ဖြစ်လာတတ်တယ်။ အကောင်းဆုံးကတော့ အင်တာနက်ကို အပန်းဖြေဖို့ အပျော်သက်သက်ပဲ အလွန်အကျွံမသုံးမိနေစေဖို့ဆိုပါတော့။ အချိန်နဲ့အမျှ စီးပွားဥစ္စာ၊ ပညာကို ရှာဖွေနေကြတဲ့ သူငယ်ချင်းအားလုံးအတွက် စဉ်းစားဆင်ခြင်စရာလေး တစ်ခုတလေ ရသွားနိုင်ပါစေလို့ ဆန္ဒပြုလျက်...

ခင်မင်လေးစားစွာဖြင့်

herostar

ကောင်မလေး

ဒီစာကို ကြက်သွန်လှီးရင်း မျက်ရည်စက်လက်နဲ့ ကိုယ်ရေးလိုက်ပါတယ်။ ကိုယ်တော့ လွမ်းတတ်နေပြီ။ ကျောင်းမှာ သင်မပေးပဲ တတ်ခဲ့တဲ့ ပညာဆိုလို့ ဒီတစ်ခုပဲ ရှိတာပါ။ ကိုယ် လည်း ဒီဘာသာမှာ ထူးချွန်လို့ ခုဆို ဘုန်းကြီးပျံရှိတိုင်း ကိုယ့်ကို လာခေါ်ကြတယ် သိလား။ မင်း ကိုယ့်အချစ်ကို လက်ခံလို့ကတော့ဘုန်းကြီးပျံရှိတိုင်း ထမင်းဝစေရမယ်လို့ ကိုယ် ကတိပေးပါတယ်။ မင်းက ကိုယ့်ဘဝမှာ သံယောဇဉ်အရှိဆုံးလူလို့ အခုမှ ပြောနိုင်တာပါ။ ကိုယ့်ဘဝကောင်းစားဖို့အတွက် စကားတစ်ခွန်းလက်ဆောင် ပါးလိုက်ပါရစေ။ အဲဒါကတော့ ကိုယ် မင်းကို ချစ်တယ်ဆိုတာ ယုံကြည်ပေးပါလို့။

အခုဆို ကိုယ် ခံစားတတ်နေပြီ။ ခွက်တစ်လုံးနဲ့...။ အရက်တွေသောက်ပြီးလို့ ပြောတာနော်။ မင်းကို ချစ်လွန်းလို့ လမ်းတွေ့ရင်တောင် မခေါ်ချင်ဘူး။ မမြင်ရလေ ကောင်းလေလို့ တွေးနေမိတဲ့ အထိဆိုပါတော့။ မင်းကို မှတ်ထားမယ်နော်။ နောက်လူများလာရင် မမှတ်မိမှာစိုးလို့ပါ။ ခုတော့ မင်းဖတ်ဖို့ ချစ်သဝဏ်လွှာကို အကြောင်းညီညွတ်လို. ဘောင်းဘီ ချွတ် (ပုဆိုးတော့ဝတ်ထားပါတယ်) ပြီး ရေးလိုက်ပါတယ် .

အချစ်ဆိုတာ တို့သိသလောက် ပြောပြရရင် တို့ကျောင်းရှေ့က အသုတ်စုံဆိုင်ရဲ့ နာမည်ပါ။ ဒါ့ကြောင့် ကိုယ် အချစ်ကို နေ့တိုင်း သတိရနေပါတယ်။ ကိုယ့်အသဲက ပလပ်စတစ်နဲ့ လုပ်ထားတာမဟုတ်လေတော့ တရုတ်ဖြစ်ပစ္စည်းတွေထက်တော့ ပိုခိုင်တယ်လို့ ပြောလိုက်ပါရစေနော်။ မင်းလေးသာ တို့ကို အဖြေပြန်မပေးရင် ကိုယ်တော့ ဒီနှစ် ဆယ်တန်းမှာ ကျဦးမယ် ထင်ပါတယ်ကွယ်။ ဖြေလာခဲ့တာ ဆယ်နှစ်ကျော်ပေမဲ့ ကိုယ်မှတ်မိတာဆိုလို့ မင်းတစ်ယောက်ပဲ ရှိတာပါ။ မှတ်ဥာဏ်မကောင်းတာတော့ မဟုတ်ပါဘူးကွယ်။ ဘာပြောပြော မှတ်မထားတတ်ရုံလေးပါ။ ခုတောင် ဆယ်နှစ်ကျော်မှ မင်းကို ပြန်မှတ်မိတာနဲ့ ဒီစာလေးကို ရေးလိုက်တာပါ။

ပျံလာမဲ့ စာလေးကို စောင့်နေမယ်နော်။

လူပျိုကြီး


ခင်မင်လေးစားစွာဖြင့်

herostar