(၁)

ဆရာသည် တပည့်ဖြစ်သူ၏ သင်ခန်းစာ စာအုပ်ကို စစ်ဆေးသည်၊ စာအုပ်ထဲတွင် ရေးသားထားပုံမှာ
ရှုပ်ထွေးလွန်းလှသောကြောင့် မည်သို့မှ အဓိပ္ပါယ်ဖော် မရ ၍ မရ။
ထို့ကြောင့် ဆရာဖြစ်သူက ညည်းတွားလိုက်သည်။ "တပည့်ရေ... မင်းနဲ့ငါ တစ်ယောက်ယောက်တော့ ရူးနေပြီထင်ပါရဲ့ကွာ"
နောက်တစ်နေ့တွင် တပည့်ဖြစ်သူသည် ဆရာ့ကို စာရွက်တစ်ရွက်ပေးသည်။ ဆရာက...
"ဘာစာရွက်လဲကွ"
"ကျွန်တော် မရူးကြောင်း စိတ်ရောဂါကု ဆေးရုံအုပ်ရဲ့ ထောက်ခံစာပါခင်ဗျာ"

(၂)

ရှင်းရခက်တဲ့ ပြဿနာတွေထဲမှာ လူနှစ်ယောက် (သို့မဟုတ်) ရပ်တည်မှုနှစ်ဖက်
မျက်နှာချင်းဆိုင် နားလည်မှုလွဲတဲ့ ပြဿနာဟာ ဖြေရှင်းရ အခက်ဆုံးပါ။
အမြင်မတူတဲ့ ရှုထောင့်နှစ်ခုစလုံးက ကျေနပ်လက်ခံတဲ့ အဖြေတစ်ခုရှာတွေ့ဖို့ဆိုတာ မလွယ်ပါဘူး။
(ပြဿနာထဲမှာ ပါဝင်နေတဲ့ ဘက်နှစ်ဖက်စလုံးရဲ့ ကျေနပ်မှုကို တွေ့အောင်မရှာဘဲ) ကိုယ့်ဘက်ကချည်း တစ်ဖက်သတ်
အဖြေထုတ်တာဟာ ပြဿနာကို ပုံဖျက် လိုက်တာပဲဖြစ်ပါတယ်။ ပြီးပြတ် သွားစေတာ မဟုတ်ပါဘူး။
စောစောက ဟာသထဲမှာ ပါတဲ့ ကလေးရဲ့အတွေးလိုပေါ့။ ဆရာနဲ့ သူနဲ့ကြားမှာ ပြေလည်စေမယ့် ပြဿနာရဲ့အဖြေကို ရှာဖွေဖို့မကြိုးစားဘူး။
သူ့ တစ်ကိုယ်တည်းအတွက်ပဲ "လုံခြုံမှုရှိတဲ့နိဂုံး" အဖြေထွက်လာအောင် စိတ်ရောဂါကုဆေးရုံက ထောက်ခံစာယူလာတယ်။
သူမရူးဘူးပေါ့။ မှန်ပါတယ်။ သူ့လုပ်ရပ်ဟာ သူတစ်ယောက်တည်းအတွက်မှန်တာပါ။ အဲဒီရဲ့ တစ်ဖက်သတ် အဓိပ္ပါယ်က တခြားလူတစ်ယောက်အတွက် ဘာဖြစ်သွားစေသလဲ....။ ဆရာက ရူးနေတာ... လို့ဆိုတဲ့ အဓိပ္ပါယ်ရောက်သွားတာပေါ့။

(၃)

ကျွန်တော်တို့ကကော....
နေ့စဉ်ကြုံတွေ့နေရတဲ့ ပြဿနာတွေကို ဘယ်လိုဖြေရှင်းနေကြပါသလဲ..။ ကိုယ့်တစ်ယောက်တည်းအတွက်ပဲ 'လုံခြုံမှုရှိတဲ့နိဂုံး' အဖြေထွက်လာအောင် တစ်ဖက်သတ်စဉ်းစားနေမိကြတာ များပါတယ်... မဟုတ်ဘူးလား။ ကျွန်တော်တို့ရဲ့ အတွေးကကော အဲလိုမျိုးပဲ တဖက်သတ်စဉ်းစားနေကြတာ များပါတယ်...မဟုတ်ဘူးလား။
ကျွန်တော်တို့ရဲ့ အတွေးကကော 'ကလေးအတွေး' နဲ့ ဘာထူးလို့လဲ ?
တခြားလူတစ်ယောက် ရူးချင်ရူးပါစေ.. ကိုယ် အရူးမဖြစ်ရင်ပြီးရော..ဆိုတဲ့ ပြဿနာဖြေရှင်းနည်းမျိုးပဲ။
အဲဒီ လူ့သဘာဝကို သရော်ထားတဲ့ ဟာသလေးတစ်ခုရှိပါတယ်။ ယခင် ဆိုဗီယက်နိုင်ငံဟောင်းရဲ့
ကွန်မြူနစ်ပါတီခေါင်းဆောင်ကြီးတစ်ယောက်က ပြောသတဲ့...
"ကျူပ်က ပြဿနာတစ်ခုကို ဘယ်တော့မှ တစ်ဖက်သတ်မကြည့်ဘူး..
မျှမျှတတဖြစ်အောင် အမြဲတမ်း နှစ်ဖက်မြင်တဲ့ အမြင်နဲ့ကြည့်တယ်.."
"တစ်ခုက ... ကျူပ်ရဲ့အမြင်
အခြားတစ်ခုက .. မှားနေတဲ့အမြင်"

(၄)

ပြဿနာဖြေရှင်းပုံ (Problem Solving) နှစ်မျိုးရှိတယ်...လို့ဆိုပါတယ်..။
တစ်မျိုးက 'ပြဿနာကို အဓိကထားတဲ့နည်း (Problem-Oriented Method)' ပါ..
နောက်တစ်မျိုးကတော့... 'အဖြေကို အဓိကထားတဲ့နည်း (Solution-Oriented Method)' ပါ...
(ဒီနည်းနှစ်မျိုးကို သင်ပေးခဲ့သူကတော့ ကလေးအထူးကု ဆရာဝန်ကြီး ဒေါက်တာ ဇော်လွင် ဖြစ်ပါတယ်)

ပထမနည်းက.... 'ပြဿနာကို အဓိကထားတဲ့ နည်း (Problem-Oriented Method)' ပါ..။
မိသားစုတစ်စုရှိတယ် ဆိုကြပါစို့.. အဖေရယ်..အမေရယ်.. အစ်မဖြစ်သူရယ်.. မောင်လေးရယ်..ပေါ့။
မောင်လေးဖြစ်တဲ့သူက အတော်ငယ်ပါသေးတယ်။ လမ်းလျှောက်တတ်ခါစ ဆိုပါတော့..။
ဟိုဟိုဒီဒီ တော့တီးတော့တနဲ့သွားရင်း ဟိုဟာလှမ်းကိုင် ဒီဟာလှမ်းဆွဲ လုပ်ရင်း..
ဖြုန်းခနဲ... ရေအိုးစင်က ဖန်ခွက်ကို လှမ်းဆွဲလိုက်မိတယ်။ 'ခွမ်း' ခနဲ မြည်ပြီး ကြမ်းပေါ်မှာဖန်ခွက်
အကွဲအကြေအစအနတွေ ဖွေးသွားရော။အစ်မဖြစ်တဲ့သူက ကမန်းကတန်း ပြေးလာပြီး သူ့မောင်လေးရဲ့ကျောကို "ဗြန်း" "ဗြန်း”...နဲ့ နှစ်ချက်လောက် စိတ်ရှိလက်ရှိ ရိုက်ပစ်လိုက်တယ်..။ ဒီလောက်ဆော့ရပါ့မလား..ပေါ့လေ။
ကမြင်းဦးဟယ်.. ကမြင်းဦးဟယ်... ဆိုပြီးပြောလည်းပြော၊ ရိုက်လည်းရိုက်နဲ့...။ ကလေးငိုသံကတော့ ကြွက်ကြွက်ညံရော..။
ကလေးကို ရိုက်မနေနဲ့.... ညည်းကိုက အသုံးမကျတာ။ ဖန်ခွက်ကို ကလေးမမီတဲ့နေရာမှာ ထားပါလို့ ငါဘယ်နှစ်ခါပြောရမလဲ။ စည်းကမ်းမရှိတဲ့ဟာမ...!! သမီးကလည်းခွန်းတုံ့မခံဘူး။ အမေကို ကက်ကက်လန် ပြန်ရန်တွေ့တယ်။
ဆူကြ၊ ရိုက်ကြနဲ့ ငရဲပွက်နေတုန်း... အဖေဖြစ်တဲ့သူက မိန်းကကို အပြစ်တင်ပြန်ရော...
"ကလေးတွေးက ဘာသိမှာတုံး .. နင်က အဲသည်လို ကွဲတတ်မှန်းသိရင် ဘာလို့ ဖန်ခွက်ဝယ်သေးလဲ.. စတီးခွက်ဝယ်ပါလား..
နလပိန်းတုံးမရဲ့" "ရှင်ပေးတဲ့ ပိုက်ဆံက ဘယ်လောက်များရှိလို့ စတီးခွက် ၀ယ်နိုင်ရမှာလဲ.. ပိုက်ဆံလေး ခြောက်ပြားတစ်ပဲနဲ့
အလကား ဘာမှသုံးမရတဲ့ ယောက်ျားကို ယူမိတာကိုး" အဲသည်မှာတင် လင်နဲ့မယား ထသတ်ပြီးဝုန်းဒိုင်းကြဲတော့တာပဲ..။

ကဲ..ဒီအဖြစ်အပျက်ကနေ ကျွန်တော်တို့ ဘယ်လိုအချက်ကို သင်ခန်းစာယူနိုင်သလဲ..ပြဿနာကို ရှေ့တန်းတင်ရင်းနဲ့ ဖြေရှင်းတဲ့ဆီ
မရောက်ဘဲတစ်ယောက်ကိုတစ်ယောက် အပြစ်တွေတင်လိုက်တော့ ပြဿနာတွေသာ ပိုပိုပြီး ပွားမလာဘူးလား..။

(၅)

နောက်တစ်နည်းကတော့...'အဖြေကို အဓိကထားတဲ့နည်း (Solution-Oriented Method)' ပါ...။
ဥပမာက စောစောက မိသားစုနဲ့ တစ်ထပ်တည်းပဲဆိုပါတော့။ အဖေရယ်၊ အမေရယ်၊ အစ်မရယ်၊ မောင်ငယ်လေးတစ်ယောက်ရယ်..။
ဖြစ်ရပ်ကလည်း..စောစောကအတိုင်းပဲ။ ကလေးက ဖန်ခွက်ကို လှမ်းဆွဲတယ်..၊ ဖန်ခွက်ကျပြီးကွဲတယ်..။
(ဒီနေရာမှာ မတူညီတဲ့ ပြဿနာဖြေရှင်းပုံကို သတိထားပြီးကြည့်ရအောင်)
အစ်မဖြစ်တဲ့သူက ကမန်ကတန်းပြေးသွားပြီး -
"ဖယ်...ဖယ်..မောင်လေး ဖန်ကွဲစတွေ စူးမယ်" လို့ပြောရင်းကလေးကို ပွေ့ချီလိုက်သည်။ တစ်ဆက်တည်းမှာပဲ
သူ့အမေဘက်လှည့်ပြီး.. "မေမေ..မောင်လေးကို မရိုက်ပါနဲ့၊ သမီးကိုယ်တိုင်က ဖန်ခွက်ကို အစွန်မှာတင်ထားခဲ့မိလို့ပါ"
"အို... သမီးကလည်း စိတ်မကောင်းမဖြစ်ပါနဲ့၊ ဖန်ခွက်ဆိုတာ ကွဲတတ်တဲ့ပစ္စည်းပဲ..၊ တစ်ချိန်မဟုတ် တစ်ချိန်မှာ ကွဲမှာပဲ"
ပြောပြောဆိုဆိုနဲ့ အမေက တံမြက်စည်းတစ်ချောင်းကို ဆွဲယူပြီး ဖန်ကွဲစတွေကို လှည်းကျင်းသိမ်းဆည်းလိုက်တယ်..။
အဲဒီအချိန်မှာပဲ ဖခင်ဖြစ်တဲ့သူက...
"ဒီအတိုင်းဆို ကလေးတွေအတွက် အန္တရာယ်ရှိတယ် အမေကြီးရေ..ဖြစ်နိုင်ရင် တို့ ဖန်ခွက်အစား စတီးခွက်သုံးကြရအောင်၊
လောလောဆယ် ပိုက်ဆံမလောက်သေးရင်လည်း ပလတ်စတစ်ခွက်ပဲ ၀ယ်ကြတာပေါ့..။ အဓိက က မကွဲဖို့ မရှဖို့ပဲ မဟုတ်လား.။"

ကျွန်တော် တင်ပြချင်တာ အဲဒါပါပဲ..။
ဒီနည်းက အဖြေကို အဓိကထားရှာဖွေတဲ့နည်း (Solution-Oriented Method)' ပါ...။
အဲဒီအိမ်ထောင်နှစ်ခုကို နှိုင်းယှဉ်ကြည့်ပါ..။ ပြီးတော့.. ပြဿနာဖြေရှင်းတဲ့နည်း (၂) နည်းအနက် ဘယ်နည်းကိုသုံးရင် ကောင်းမယ်ဆိုတာ ကိုယ့်ဘာသာကိုယ်ပဲ တွေးကြည့်ကြစေချင်ပါတယ်...

(မင်းခိုက်စိုးစန်)
##############################
ကျွန်တော်ကြိုက်တဲ့ စာစုလေးတွေပါ....
သူငယ်ချင်းများအားလုံးကို မျှဝေခံစားစေလျက်...